النهارده عدّى عليّ ابن عمّتي عتريس... ايوه هوّ كمان اسمه عتريس... معرفش ليه..

غالبا بيعزّوا العتارسه عندنا في البلد...

ما علينا...

ابن عمّتي متحضّر عني شويّه... فخدني معاه لسوبر ماركت كبير كده مسمّيه "مول"...يسمّيه مول يسمّيه توتو رحنا و خلاص...

المهم انّي دخلت محل "أديداس" فرع البلد... و لقيت تيشرط كده عجني... أبص في السعر ألاقيه بـ600 جند... ليــــــه؟! مفهمتش أنا الحاجات دي طيّب حد بيشتريها؟ مش الموضوع كلّه قماش برضه ولاّ أنا بيتهيّألي؟

ده أنا لو جبته و رحتلهم بيه في البلد أبويا العمده يعلّقني من بطحتي صبح و ليل و يخلّيني أعملّه عجينة الفلاحه اللى محدّش في الفلاّحين أصلا بيعرف يعملها...

ده غير انّه حيلبّس التيشرط للجاموسه كوارع... اللى لسّه يا سنسن متحلبتش...

أكتر حاجه لفتة انتباهي هي اللى الحريم عملاه في نفسها...

هم شكلهم بيدوّروا على جواز غالبا...

أو يمكن الأشكال دي مش محتاجه تتجوّز أصلا... على الأقل في الوقت الحالي... اللى فيهم مكفّيهم أكيد... كمان حيتجوّزوا؟!

المشكله اني أنا راجل أعزب و أعرف ربّنا... طب أنا أعمل ايه لحدّ ما ألاقي واحده تنفع؟ منزلش من بيتنا؟ و المنظر نفسه بقى في الشغل... مشتغلش؟ آخد واحده من الـ"مول"؟ ولاّ "أقضّيها"؟ ما هة ان جت عالتقضيه التقضيه سهله... دي بقت تتباع في المول هي رخرى...

التقضيه طبعا... متخلّيش مخّك يروح هنا ولاّ هنا... لسه الموضوع ده مجاش أوانه... بس هانت يابا العمده...

عارفك أنا مستنّي على نار...

و على ساحة أخواتي اللولوليّات... شفت حاجات عجبتني...

ابدأ ببوست للأخت الفاضله دنانير ... هو مالوش علاقه بليلى ده أوّلا.. و مش هي اللى كاتباه ده ثانيا... اللى كاتبه على حد قولها محمد دسوقي رشدي، كاتب في جريدة الدستور...

قبل ما ننقل للمواضيع الأخرى... ايه رأيك في الدستور يابا العمده؟ أنا آسف نسيت انك أمّي...

بص يا حج... الدستور اللى حازت على الاقبال الجماهيري كجريدة المعارضه الأولى حاليا... للأسف بيتكلّموا كتير من غير أدلّه... و الكلام الكتير من غير سند بيدخل في نطاق السبّ و القصف... و للأسف ده بطّيخ... و للأسف دي تهمه دفنوا بيها ابراهيم عيسى... بس ما هو كان ايه المتوقّع يا سيّد ابراهيم؟ حيسيبوك تشتم كده بطّيخي؟ يا راجل فوق بقى...

مش هو ده الحلّ...

الكلام الثوري جميل و منشّط للخمول اللى ساد على المجتمع المبتلى ده بس مش الحل انك توزّع منشورات رسميّه بتشتم فيها في ده و تسب في ده... و الله أعلم اذا كانت نيّته انّه يبيع جريدته بس ولاّ انه فعلا يعمل فرق و لو طفيف... ممكن شخص... فرد... يقرا مقاله تدّيله حافز و يبقى هو رئيس الجمهوريه الطشطيّه... الله أعلم... جايز.. يا رب

خلاصة الموضوع... المقاله حلوه و ابقى روح اقراها يا حج... ده طبعا لو بتعرف تقرا..

أكتر بوست عجبني... و يا ريت يا بتوع ليلى تقروه و تفهموه قبل ما ترجعوا من اليومين الأجازه بتوعكم بتاع الأخت الفاضله لست أدري الزرقه... اللى اكتشفت انّها من مؤسّسي الـ"حركه"... هي برضه ذكرت في تدوينات أخرى التاريخ السرّي و القيادي لانشاء الحركه (و خلّوا بالكم من السي أي ايه) دول بقم مابيصّدقوا... عموما يا أخت "لست" أنا قريت و فهمت و اقتنعت... لكن المشاكل الشخصيه أنا لازلت رافضها... و من حقّي اني أرفض طالما أنا عالبلغغ بتاعتي و طالما أنا مواطن طشطي و خايف على مستقبل بلدي...

بس غير كده... لو الموضوع زي ما انتي قلتي كده بالضبط... يبقى ربّنا معاكي و حبقى أوصّي البت سنسن تعملّك طاجن باميه عشان يسد جوعك و انت رايحه تجاهدي... و مستعد أسلّفك الكلب اللولو بتلعي فوفّه... بس أوعي تهوهوي في وشّه أحسن ده بيعضّ...

و مش بس كده... لو محتاجين راجل يقودلكم الحمله... أنا ممكن أبعت شويّة أفكار ظريفه مع حمام زاجل... بس حسّك عينك ألاقي واحده داخلالي بتقوللي عايزه أصاحب ولاّ أنا متضايقه انّي بتعاكس... أمثال دي حنوقّفها طابور لوحدها... و يا سلام لو الطابور متعملش... أشوووف طابور يا هانم يلّى زعلانه ان الرجاله بتعاكسك و انت لابسالى بودي "بطن" ولاّ بنطلون نص كم... طــابوور..

الطريف في الموضوع برضه اني لاحظت (و دي مالهاش علاقه ببلغغات أبله ليلى) ان معظم البنات اللى مش متجوّزين و مع ذلك متضايقين بيبقوا مرّوا بخطوات ألا و هي كالتالي:

الخطوة الأولى: عرفوا واحد... صاحبوه بمعنى أصح... و معظمهم لو سمعوا كلمة "صاحبوه" دي حيجلهم أزعرينه في دماغهم... هي بتبقى علاقة "استكشاف"... يعني لا تدخل في نطاق الصحوبيّه... مع انّها يابا الحج بتكلّمه في الموبايل النوكيا كل ليلة لحد الساعه 4 الفجر و بتخرج تشوفه... جايز عشان مبيسلّموش على بعض بالايد؟ عموما أنا مش حنتقد... هي حرّه..

الخطوة التانيه: انّه يبتدع أي حاجه يفركش بيها الموضوع بعد ما يشوف واحده عاجباه أكتر... غالبا بتبقى صاحبتها اللى بتبدأ تهرّج معاه و ترميله مواضيع غاية في التشويق...

الخطوة التالته: كرامتها مجروحه... كلّهم كلاب كلاب كلاب... كلّهم زي بعض... و جرت العادة ان اللى مش محجّبه بعد ثالث علاقه استكشافيه بتتحجّب...

و دي نصيحتي ليكي يا أخت ليلى... خلّيكي ذكيّه و سيبك من كلام أغاني الحب بتاعة الواد حماده صكلانص... قبل ما تطالبي الناس انّها تحترمك احترمي نفسك..

نرجع للأهم...

ايه موضوع "من قلبي سلام لبيروت" ده؟ يلا... أضعف الايمان برضه..

دخلت بقى على بلغغ غرندايزر... أظن هي راس التعبان يعني... بنت مصريّه... أوّلا أحب أهنّيها على اعتزازها بقوميّتها و ببلدها و أهديها وسام الحلزون الأخضر للأعمال الأنثويّه المهلّبيه... و هو أعلى وسام في جمهوريّه طشط الاستعماريّة مخصّص لكل ما هو جميل و أنثوي...

اللى داخل يشوف الصفحه يخلّي باله... الصفحه تقيــــله لدرجة أن أم عتريس بقت فراشه جنبها و جالها عقدة نقص...

و صلّوا على النبي...

كمان زيدوا النبي صلاة... (أهه ثواب برضه يا زينب)

هامش 1 : ميّه ميّه يا باشا و علم و قيد التنفيذ... هات ياد يا عويس بطرمان المشّ

هامش 2 : أولا ادّيني خمس ثواني أضحك على "المجموعه الخماسيّه" دي (خمس ثواني)... شكرا.. أنا مقصدش بالضحك اني أستهين بالكلام... بالعكس عاجبني جدا... لكن الكلمه فكّرتني بذكريات من الطفوله... عموما هامش اتنين أخو هامش واحد التوئم... و مقدّمش جديد للمشاهد...

هامش 3: فين الحل التالت؟! :-o

كلام ميّه ميّه برضه... و أنا حأكتب الاضطهاض اللى بمرّ بيه فعلا في الآخر...

هامش 4: بلا نيله فعلا... بس اللى قال نوال السعداوي يا مزمزيل كان بيتكلم عن صاحبتكم اللى كتبت انها عايزه تشيش و تسهرو تصاحب و تمارس المعصيه زي مثال الراجل الصايع اللى هي شايفاه... ولاّ انتي أي واحده حاطّه بوستر "كلنا ليلى" بتاعك ده حطّالها لينك عندك من غير ما تقري؟ عموما أنا متأكد ان الخطأ ده مش حيتكرّر و بما اننا كبرنا و بقيما بنحط هوامش فأكيد حتبصّي كل يوم على بلغغات صحباتك الليلويّات,,,

هامش 5: الحمدلله انّه فرق معاكم (بدون سخريه والله)

هامش 6: اذا كانت مشكلتها بسبب راجل فده مالوش علاقه بالمجتمع... دي مشكلة شخصيّه... تروح تشوف الجدع اللى قارفها فين و تتكلّم معاه بالعقل و ربّنا مع المسكين و المظلوم

هامش 6 مكرّر: هممم... مفهمتش حاجه بس ما علينا... دي مبقتش هوامش دي بقت استغمايه..

هامش 7: هممم... أنا مشفتش الفيلم ده بس شكلي كده حانزل أجيــبه حااالا (كداب يا عتريس كداب)

هامش 8 مش موجود أصلا...كماان ميعرفوش يعدّوا؟! و أنا اللى قلت ليلى دول شدّوا حلهم و بقوا زي الفل؟

هامش 9: أحبّك و انت بتتفلسف

عموما كلام البنت دي كويّس بس لو تسمع نصايحي...

و في النهايه عندي أسئله لأبله "سيرليف" أحب أعرف اجابتها...

1. ليه في الشغل عندي البنات بيروّحوا بدري؟ متقوليش عشان عندهم بيوت؟ أمال احنا اللى نايمين في الشارع؟ مش قلنا مساواة؟

2. ليه الشغل مصنّف لشغل حمير و شغل حريم؟

3. ليه البنت اللى تهرّج مع مدير بتتضبّط في معاد البونص و الأرباح؟

4. ليه الولد لمّا يشوف بنت مزنوقه في ميكروباص بيوسّعلها شوية عشان متتزنقش؟ طب ما لو الحياة فل و كلّنا واحد طب ما خلاص بقى مش فارقه ولاّ ايه؟

5. ليه البنت بتبص صاحبتها شبكتها كانت بكام قبل ما تقرّر هي عايزه شبكه بكام؟

بيتهيألي كفايه كده النهارده... أنا زهقت و ودني واجعاني و عندي صداع و داخل أنام...

اللى عايز حاجه يبقى يسيب رساله مع الحاج سليم اللى قاعد عالمصطبه ده... و اللى مش عايز ان شالله عنّه ما عاز..

مش ححسّس النهارده... البطحه بدأت تخفّ...

و الله الموفّق... و تصبحي على خير يا نووووون