تم انشاء هذا البلوغغ لغرض المساواة... و الغلاسه

 Ø³ÙˆÙ…ÙŠ

 

« Home | شيرشيه لا فيم فعلا » | "كيفيّة انشاء الـ"كالت »

رسالة من ابا العمده الى أبله ليلى: الأم المدوّنه - غرندايزر





النقاش مش عيب و لا عمر عتريس استهزأ من كلام ليلى و أخواتها طالما يدخل في نطاق الشكوى... ولكن أولا.. الشكوى لغير الله مزلّه... الحريم مش حينفعوا بعض... وكون الموضوع دخل في نطاق الـ "صوت الواحد" اذا فهو بيدخل في نطاق ال"كالت" بكل ما تحمله فرنجة الكلمه من سخريه للأسف

أظرف حاجه اني مشفتش بلغغ خاص بيكي يا ليلى هانم... أو لسّه معرفتش أوص للأصل... راس التعباان يعني

مسيييري ألاقييه

ليلى هانم كتبت الآتي:

((ثالثا: أخذ علينا البعض أننا لا نمتلك أجندة أو أيديولوجية واضحة، و نحن نراها نقطة قوة. ليست لنا خلفيات أو أفكار مسبقة فما نحاوله هو فتح حوار حول وضع نراه ظالما لنا من واقع تجاربنا الشخصية. هي إذن دعوة للمشاركة في كتابة الأجندة معا))

و نحن نراها نقطة قوة؟؟!! دول يا جدع مش عارفين هم عايزين ايه.... من الآخر اللى الواد عتريس فهمه كالآتي برضك..

1. مفيش خطه

2. مفيش مطالب أصلا

3. هي بالضبط قعدة ستّات حيبقى يقول لأم عتريس عليها علشان هي فاهمه الموضوع غلط

4. كل واحده عندها مشكله في بيتها قالت أنا بدل ما أحاول أحلّها بالعقل... أنا أروح أنشرها عالنت و أبقى جزء من "قضيه".... دي صفه بشريه... كلّنا نفسنا نحسّ اننا جزء من قضيّه.. اننا مهمّين... عايزه تعرفي منّك ليها انتي مهمّه ولاّ لأ روحي لجوزك ولاّ لأبوكي احكيله عن مشاكلك... والله احنا ما حننفعك.

طب سيبك من ده كله... تيجي تشوف الردود على بوست ورا التانيه... عارف تلاقي ايه؟ (خد بالك ان مفروض لو هم فعلا شايفين ان كلّهم واحد ينصحوا بعض)

تلاقي كل واحده ردّه كاتبه :برااافووو... أو واااو.... أو قلبي معاكي، صحيح كلنا ليلى... أو حاسّه بيكي والله و ليلى خرجت من صمتها...

ايه الهبل ده؟؟!!

فين الاتّحاد؟ فين حلّ المشاكل؟ فين النصيحه المرصّعه بالحكمه؟ هو كل حاجه زن زن زن؟ حتى يوم ما تقولوا حنحلّ مشاكلنا مع بعض... برضه بالشكل ده اللى بيصرخ للناس انها تسخر منّه؟

جت أبله ليلى قالت ايه كمان؟

((اختيارنا لساحة التدوين لم يكن لخلق تكتلات جانبية بين المدونين أبدا، بالعكس. لقد أردنا الاستفادة من المساحة الحرة التي يسمح بها التدوين للحوار، و كذلك لعلمنا أن لنا مصداقية سابقة بينكم كمدونات، فنحن لسنا رقم في معادلات خارجية أيا كانت. نحن نتكلم من واقع تجارب شخصية و ليس لأننا مدفوعات من جهات ما. كذلك نؤكد أن مدوناتنا لن تتحول لمنابر أحادية التوجه أو التفكير لا تهتم سوى بمشاكل ليلى، فمدوناتنا بدأت كصفحات شخصية تنقد و تتفاعل مع العديد من الأحداث و المشاهدات التي نراها على ساحة الوطن...و ستظل كذلك))

آه.. يعني عايزين تتكلموا كده يعني... بدون هدف... قعده حريمي من بتوع أم عتريس و الست أم سفروت مرات أبا العمده... طيب يا ستّي و ماله؟ أجيبلكم شوية ينسون؟ شيشه(عارفكم أنا نفسكم فيها)؟نسكافيه؟شويّة سمنه في كبّايه؟

((يوم ليلى الأول 9/9 ليس هو الغاية في حد ذاته، بالعكس هو بداية.))

يوم ليلى؟! 9/9؟! والله بتفكّرني بكارثة 11/9 كده... انتم ناويين على ايه؟ هااه؟ أوعدكم مش حقول لحد... حاسس ان ليلى حتطلع بن لادن في الآخر.. لأ اللى أنا حاسس بيه فعلا ان ليلى ما هي الاّ عقل مشتّت غرضها تشتيت عقول الأخريات في المجتع ضعيف الهيكل اللى احنا عايشين فيه النهارده...

أنا برضه مرّيت و أنا بتصفّح البلغغزز ببلغغات ظريفه و فعلا بتقول كلام عميق الصوت... منها مثلا الأخت الفاضله جيرونيمو...و فريده اللى كلامها فعلا واقعي.. و هنا بقى بوست عجبني برضه للسيده الفاضله ذات الرأي الصائب الطوبه الزرقه مع أنها مفهمتش ان لمّا قريبها قلّها تسكت كان خايف ان سوّاق الميكروباص يقلّ أدبه لمّا يلاقي بنت بتسبّله... فعلا يا أخي... مشكلتهم أنهم مش فاهمين ان لمّا نقوللهم يسكتوا بنبقى بنبص نظره طويلة المدى شويه... روحي البسيلك نظاره... و في موضوع السواقه و البنات... دي بقت شيء أساسي للبنت في رأيي... و في منهم بيسوقوا أحسن من الرجّاله أصلا... لكن متجيش تتخانقي مع سوّاق ميكروباص... اذا كنّا احنا بنتفاداهم... بس لو معاكي حق و لقيتيه مش راضي يفهم و يسمع سيبي حد يكلّمه علشان انتي عارفه لو ردّيتي عليه حيعتبرها اهانه... و هنا ممكن أبقى في صف ليلى.. بس مش حروح أخاطب الموضوع عالنت... الناس اللى عندهم مشكله في التفاهم مع الحريم زي سواق الميكروباص ده مش قاعدين عالنت و ميعرفوش يعني ايه نت أصلا... حتلاقيهم قاعدين في القسم أو عالقهوه بيضربوا "كلّه"... و هنا بقى المشكله...المجتمع عنده مشاكل أهمّ يناقشها..

الأولويّات يا بت يا بهيجه... الأولويّاااات!!

في واحده بقى اسمها ليدي أوف أنثراكس (اللهم احفظنا) كتبت جمله ظريفه.. بتقول ((دى نقطه مهمه نفسى اشوف الاهل يهتموا بتعليم البنت زى الولد)).. والله احنا معندناش مانع.. انزلوا انتم اشتغلوا و ادفعوا للشبكه و المهر و اكتبوا على نفسكم مؤخر... و شطّبوا و أوعوا تقولوا ما كلّه النص بالنص عشان ده كدب... ما هو بابي اللى بيدفع... ولاّ بابي هو كمان ليلى؟ الأهل بيبقوا عايزين البنت تاخد شهاده محترمه عشان ولادها تعرف تربّيهم على الأخلاق و العلم بمصداقيّه... مش علشان تفتح هيّ البيت... الأم (اللى فاهمه بس طبعا) مدرسه...

و بالمرّه و احنا قاعدين... أنا شبكتي مش حتقل عن 30,000 جند.. و تكون تلات حتت ألماظ و سندوتش كبده من عند أبو رامي (هم صحيح نقلوه؟)

ولاّ كلبوزه اللى نفسها تعمل رجيم؟

طب دي كلبزت امتى طالما مش لاقيه وقت تهرش في كرشها؟ و بعدين معندهاش وقت تهرش طب لقت وقت منين تعمل بلوغغ و تدوّر على صوره ساخره؟ و بعدين هل هي متجوّزه؟ هل هي عارفه ان الشغل في الخليج صعب؟ و ان الراجل مننا بيطلع عينه علشان يحاول يحافظ على وظيفته؟؟

يابا العمده كفايه كتابه أم عتريس عايزه اللاب توب بتاعها..

و متمسكوش بعنف كده ليتكسر...

حسّس عليه.. ولاّ أقوللك.. ده بتاع أم عتريس... انشالله يندش عالأرض

بطحه بس اللى يتحسّس عليها...

أجيبلك بطحه يا عمده؟

عارفك أنا بتعزّهم زي عينيك...


اهم حاجة يا عتريس ان مافيش حد معبرك من ليلى و انت لسا مستمر

تفتكر ليلى هانم محتّطش لينك للصفحه دي ليه عندها في ردوج أفعال؟

ما علينا... كلّنا بطحه ما هي الاّ اختبار للمجتمع.. أنا مستنّي أشوف نتيجة الاختبار ايه و على أساسه عتريس حيبفى عنده كلام يقوله يا محمد بيه يا ذا الكلام المفيد

layla de lazem tefham en elly bte3melo da mesh hywsalhom le 7aga .... 3agabny 2wy elpost bata3ak .... w fekret elblog men 2aslo .....
ya reet t7awel tenshoroh 2aktar ...5lehom yeskoto shwya

و الله يا أستاذ كلمه بحاول بس المشكله أنهم بيحاولوا يسكّتوني بأسلوب "مش حردّ عليك علشان لو ردّيت عليك حعملّك اعتبار".. لو اللى موافق عالفكره يشاركنا برأيه عنده و يعمل لنك للصفحه حنخلص كلّنا من وجع القلب ده

ليه كده ياعتريس الطيب أحسن ماتسيب ليلي تعبر عن نفسها وبلاش كتم الأنفاس ده
من الآخر أستني عليهم شويه لكل تجربه أخطاء يمكن تجاوزها ومن الصعب الحكم عليها من أول يوم
والا ايه ياعم عتريس
وعلي فكره انا مكسوفه موش ليلي

مزمزيل مكسوفه... والله ليكي حق تتكسفي طول ما بتوع ليلى دول فضحنّا عالنت.. حاجه تكسف فعلا مش كده؟
و بعدين ألحقهم من الأول قبل ما تبقى "ضيه" بجد و هي أصلا بطّيخه بكل ما تحمل الفاكهه من سخريه ..

قرعه... و ميتحسّسش عليها للأسف

أنازفـــت؟! الله يسامح و يهدي و ياخد...

مشكور والله مشكور يا أستاذ عفركوش القبر... أنا لمّا شفت البروفايل بتاعك جتلي حالة زعر و فزع و اتشهّدت ... بس مشكور برضه..

يعني خلاص حيحطّوا الرقابه اللى قلتلهم عليها؟
طب ما كان من الأول.. لازم يعني رااااجل اللى يقولّلكم تعملوا ايه؟

مفيش فايده يا عم عفركوش.. احنا بنضيّع وقت و نفس..

أنا نازل أشيّش ... نفس الشيشه أفيد من نفس أبله ليلى

ههههههههههههه

معاونك ده بقى عتريس اللي كان مع فؤادة في " شيء من الخوف"؟
باينة من أولها
طيب يا أستاذ " بطحة " - أتمنى أن تكون الرؤية أوضح من فوق رؤس الآخرين اللي انت عليها - و مرحبا بك في عالم الغلاسة عضوا فعالا

ثم ما انت ترسالك على بر في الغلاسة بتاعتك ، ما تبقاش عامل زي الاعلانات الغريبة اللي بتجيب لك الواحدة جارة الجاموسة و ماسكة موبايل في الايد التانية، يعني لاما تتكلم بلغة "أبا العمدة " اللي بتتكلم على لسانه، و اما تتكلم براحتك بقى في " كالت " و لا ماكلتش
دي نقطة بالنسبة لفنيات الكتابة نفسها


نيجي بقى لكلام سيادتك يا بطحة باشا - مسيرك تتعالج يا حلو و مايكونلكش وجود بعد كده-

أظرف حاجة ان كلامك يدل على انك - كبطحات أخرى كثيرة - اتغظت م اللوجو و من الاتحاد ده في حد ذاته و نادرا ما قريت حاجة ، و بالطبع اما أنك لم تقرأ المداونة الأصلية لدينا ، أو قرأتها بعقل مغلق عن السمع ، و بالتالي لم تستوعب شيئا من الأمر
و أجمل شيء ، ان أصلا مافيش واحدة منا اسمها ليلى أصلا

و طبعا لان عتريس باشا- " باااااااااطل ... بااااااااااطل .... بااااااااااااااطل ..." - عمره ما استهزأ من كلام ليلى و أخواتها ، و لأنه مُقدر جداا لقيمة النقاش المحترم - فأكيد في عرفه " ايه الهبل ده " دي قمة الاحترام ، و لا هايتكلم عن واحدة منا بطريقة فيها تريقة و لا هايحاول يهين حد و أكيد الكلام ده مدسوس عليه طبعا
ولاّ"
كلبوزه اللى نفسها تعمل رجيم؟
طب دي كلبزت امتى طالما مش لاقيه وقت تهرش في كرشها؟"


و طبعا صدقت لما قلت انك م الناس اللي مش هاينفعونا في حاجة



و إن كنت أعترف ان الأخ عتريس عنده بعض من حق في بعض الكلام الذي قاله بالنسبة لبلوجات جيرمنيو و فريدة
و بالنسبة لتعليقات بعض اليلات عند بعضهن الآخر ، و ان كان ده شيء يمكن تفسيره بزيادة الحماس من ناحية ، و الاعجاب أحيانا بالشكل الفني للكتابة من ناحية أخرى

و بالطبع السيد عتريس / أو بطحة - كلاهما سيان - نظر كالمعتاد للزواج كونه بيع و شراء و شبكة و مهر ، الخ ، الخ
و تحدث عن الشهادة - في بلد التعليم فيه فاشل أصلا ، اضافه لكون التعليم المهني شيء و الأخلاق و العلم اللي بيتكلم عنهم دول شيء تاني خالص ، و اضافة لكون العلم الذي لا يُستخدم لا فائدة منه و بالطبع يُنسى - بنفس الطريقة العقيمة التي تداري حقيقة مفادها أن المسألة مسألة تباهي لا أكثر / و يزيد من قيمة - ثمن بالأحرى - العروس اللي معاها شهادة أعلى


أما الأهمية التي تتحدث عنها ، فلا يعطي أهمية للانسان سوى نفسه أولا ، و آخرون متفهمون له و قادرين على الاحساس به من ناحية أخرى
و لأن الزوج أو الأب غالبا على الشاكلة العتريسية دي ، فلا أمل هناك لتنفيذ اقتراحك المبجل

و بالطبع ، كلنا نريد الاحساس بأننا جزء من قضية ، و القضية موجودة بالفعل ، و القضايا الكبرى في حياة البشر - سواء تلك التي جاءت بنتائج ايجابية أم تلك التي انتهت نهايات تناقض بداياتها - بدأت بشكل مماثل

قضيتنا بدايتها تؤكدها كتابات ككتابتك هنا ... لمجتمع يصم الآذان عن السمع أو الفهم ...
و لو قعدة الستات اللي سيادتك اتكلمت عليها دي ، كانت قعدة فيها " ستات " بتسمع و تفهم ، و تضامن ، بعدين تحاول الحل تبقى أجدع من مليون حد معلق على أي مداونة و هوه أصلا مش قادر يسمع أو يفهم هيه بتقول ايه

و أخيرا .... فيه صفة بشرية تانية حضرتك نسيتها ، الناس مش محتاجة لنصايح و حلول مقولبة ، الناس محتاجة لحد يسمعها و يحس بيها في الأول ، عشان يقدر يتفاعل معاها صح

يا عم عتريس

هو احنا يا عاملين مدونات ليه؟..مش عشان نتكلم براحتنا؟؟

احنا ما ضربناش حد على ايده و قلناله تعالى اقرا ..انت اللي بتروح على مدونة بتقراها ..لا عملنا اعلانات و لا بوب أبس..و لا حاجه أبدا

انت جيت و قريت ..عجبك ..قول
ماعجبكش ..برضه قول

بس ليه تشتم و تهين ؟

يا سيدي يمكن فيه حد اندفع لكن ده لأن فيه بلوجريات صغيرين في السن و لسه مالهمش خبرة و اندفعوا شوية ..لكن ده برضه مايبررش الهجوم عليهم ..لو عندك ليهم نصيحه ..قولهالهم

لكن ليه الإهانه ..مش عاجبك ماتقراش ..ماحدش خد منك فلوس عشان تقول سيما أونطه هاتوا فلوسنا ...ببساطه ..مش عاجبك اللي مكتوب ماتقراش ..أو سيب تعليق بس في حدود الذوق

وابقى سلملي على فؤاده...سلام

الأخت الفاضله شغف...
والله زعّلتوني... منكم و من نفسي... أنا مغلطّش في ولا واحده فيكم لأنكم في النهايه أخوات فاضلات... و في النهايه كان ممكن أختي تبقى هي اللى قاعده عملالي فيها ليلى محررة المرأه.. عموما أنا لو كنت شتمت أو قلّيت أدبي على أي واحده فيكم فأنا اعتذر...
لكن أنا لا اعتذر يا شغف على الأسلوب... لأن أنا علشان أخلّي الناس تيجي و تسمع كان لازم أعمل البطحه دي بأسلوب ساخر... السخريه من الفكره مش شتيمه فيكم... لكن كان نفسي زي ما أنا قريت عندكم انتم برضه تفروا عندي....
للأسف حاجات كتير الواحد بيبقى نفسه فيها مبتحصلش...

(أنا عرفت ان كلنة زفت اتقالت على عتريس... و أنا اعتبرت أن الكلام ده فعلا موجّه لعتريس علشان ميبقاش الموضوع خد محور تاني...

دلوقتي أنا حردّ على تعليقاتك..
شكرا أولا بوصفك لي اني عضو فعّال في عالم الغلاسه... سبحان الله... كلمة غلس دايما كان الواحد يسمعها يحسّها كلمه هبله و مش اهانه... لكن على لسانك فهي تقيله جدا و أنا مش حردّ و حفوّت تاني...

موضوع بقى غلاستي بالنسبة لـ"فنّيات الكتابه"... أنا لا فنّان و لا كاتب أصلا... و كنت بحاول أعمل حاجه تفيد الشعب التافه اللى حوليّه اللى مش بينجذب غير للتفاهه..
أيّام حرب لبنان عملت العجب عشان أحس ان ممكن نعمل حاجه... و فشلت... ايد لوحدها متصفّكش... و للأسف كنت ايد واحده فقط... عملت بوستس و دخلت أعلّق يمين و شمال... لكن برضه محدّش كان بيقرا و محدّش كان بيكتب... لحد ما لقيت "كلّنا ليلى" دي...
قلت مـــاشي... أمّا نجسّ نبض الشعب و نشوف...
للأسف لقيت القيامه قامت منت كلا الطرفين... رجّاله و ستات... فمتجيش تعلّقيلي على أسلوب كتابتي... أيوه العربي بتاعي وحش... بس على الأقل عندي الجرأه أقول رأيي و الأهم أوصّله للقارىء

فعلا... شعب تافه...
الأولويّات يا أخت شغف...الأولويّات...
مسيري أتعالج و ميكنش ليّه وجود؟؟ّّ
ايه؟ حتعملوا فيّه ايه؟
ربّنا يستر...

اطغزت من اللوجو؟ مش مهم لوجو ولاّ مش لوجو... لمّا واحد يسخر من شيء فكل شيء مباح... و اللى على راسه لوجو بقى..

كون مفيش ولا واحده اسمها ليلى ف ده شيء مش مهم بالمرّه... كان نفسي أصلا.. و أصدقائي عارفين كده عنّي... انّي أسمّي بنتي ليلى... لكن خلاص بقى مظنّش.. شكلي حسمّيها سنيّه و ادلّعها سنسن...
لا يمكن انّك تنكري ان فيه كلام كتير مستفز انتم كتبتوه... و كلام شخصي للغايه لا يعني الجماعه في شيء... أنا فعلا قريت معظم التدوينات… و مؤخّرا بقيت أحط لينك للبلوج علشان مبقاش مفتري… و ربّنا عالم أنا كان في نيّتي ايه
أنا عمـــري ما سألت أي بلوجر انت كاتب كذا ليه... من حق الواحد يكتب اللى هو عايزه و يفضفض اللى هو عايزه..
لكن كون واحده تدخل تشتكي من بيتها لناس غرب بس علشان همّا بنات!!! زعّلني جدا و يقيت بدعي فعلا ان مراتي تبقى تيجي تقولّلى لو أنا دايقتها في حاجه الأول...
And that, my friend, is the point I've been trying to address. Sadly, however, I failed miserably.

((و طبعا صدقت لما قلت انك م الناس اللي مش هاينفعونا في حاجة))
متشكّر لذوقك

طب انتي قولي لي يا شغف... دقيقه كده انسي انّك ليلى ولاّ بتاع و ردّي على سؤالي...
كام واحده من اللى اشتكوا فعلا لاقوا النصيحه؟ مش كانت كلّها برااافو و هايل و ليلى خرجت من صمتها؟؟
أنا آسف بس أنا حاسس أني أنا أكتر واحد أصلا قدّم نصائح للليلات... و اللى شايف ان الكلام ده غلط يقول...

بالنسبه لكلبوزه مكنش الغرض السخريه من وزنها ولا الاسم... كان الغرض السخريه من مضمون... و أنا شخصيا مش معصعص يعني... عموما... لن يتكرّر هذا الخطأ...
و مش عيب اللى يغلط يعتذر يا شغف... أظن انتي مدينه لي باعتذار..
كونك معترضه على نظام التعليم دي حاجه تانيه و نقاش متفرّع لجهة أخرى..
أنا مش عارف ايه اللى فتح الحوار ده بس اللى أقدر أقوله أني أحب مراتي و أختي و بنتي يبقوا مرّوا بكافة السنوات و المراحل الدراسيه... متفرقش معايا خرّيجة ايه... ما هي في الآخر حتشتغل بواسطه للأسف..
لكن يهمّني طبعا (مهما كان مستوى سوء التعليم) انها تتعلّم... حتّى لو نسيت اللى اتعلّمته قدّام... الشخصيه بتتكوّن في المراحل الدراسيه... لو عندك اعتراض ابقي قعّدي ولادك في البيت و علّميهم انتي...

يعني والدك و جوزك عاملين همّا كمان عتريس؟ همّا الاتنين؟ I find that hard to believe.

يعني أنا الدليــــل انكّم فعلا في محنه؟!
سبحان الله بجدّ...
عموما الله يسامحك و أنا حعرف أرد عليكم ازاي

و الطريف في الموضوع انك برضه يا سوسه مسكتي في الاهانات و الشتايم...
قصدك كلبوزه يعني؟؟ برضه؟

طب مفيـــش أي حاجه أنا قلتها نفعت حد فيكم ببصله؟؟

يا ريت اللى حسّت انّها كانت غلطانه بالانضمام للحزب المشتّت ده متتكسفش... كلنا هنا اخوات.... فيما عدا عتريس اللى بقى ونتد في البوليس الحريمي السرّي

أنا مش مصدّق الناس اللى دخلوا قروا و مستفدوش دول...

اللهم احفظنا فعلا

Post a Comment

    Ø¯Ø³ØªÙˆØ± يا ست ليلى

  • عتريس
  • جمهورية طشط العربيه
  • اللى على راسه .... يحسّس عليها
و عالأصل دوّر

الأرشيف