فاكرين الطشط بتاع علم الجمهوريه؟

ايوه

حنجيب نفس الطشط البرتقاني ده و نرشّ عليه شوية بصل مفروم علشان الريحه ابتدت تروح.

حتحطّ في الطشط الحدّوته التاليه:

راح عتريس ابن أم عتريس سأل العمده.

هو انتم يابا الحاج لمّا جيتوا تعمّروا البلد عملتوا ايه؟

قاللي أبدا... لمّينا النسوان و رميناهم كلّهم في أوضه ضلمه.

قلتله و بعدين؟

قاللي و بعدين اتجمّع كبرات الجماعه و اتّفقنا (و حطّوا تحت اتّفقنا دي خمسين خط) على الغرض من تعمير البلد و الغرض من انشاء الجماعه أصلا. طبعا سمعنا آراء عجيبه و مخلّه ياد يا عتريس. بس في اللآخر اتّفقنا حنعمل ايه... حكم انت عارف لو كل واحد اشتغل بمزاج اللى جابته البلد عمرها ما كانت حتعمر.

قلتله عدّاك العيب يابا العمده... سمّعني أكتر يا راجل يا كمّل يا حكيم

قاللي بعد كده يا وله طلّعنا النسوان و حفّظناهم ملخّص الأفكار اللى اتّفقنا عليها.

قلتله هاااه و بعدين

قاللي بعد كده بقى في رقابه مفتوحة الرؤيه على كل اعضاء البلد المشاركين في التدوين و الانشاء... حكم انت عارف ياد يا عتريس... لو سبناها سايبه كل من هب و دب حيجي يقول لك طب م أنا عندي كلام نفسي أقوله و بيت فوشيا نفسي أبنيه... وأنت عارف ياد ان الفوشيا لون متخلّف و ممكن يهدّ الحضاره و البلد اللى نفسنا نقوّمها من تاني. لو كل واحد اشتغل بمزاجه يبقى ايه لازمت اننا اتجمّعنا و عملنا الـ "كالت" على رأي شباب اليومين دول.

قلتله يا سيــــــدي عليك. فطّمني أكتر... العلم نورن برضه.

قاللي لأ خلاص كده النهارده أنا حقوم أشوف البت معملتش الشاي بتاعي ليه.

العمده قام من مطرحه و أنا عمّال أفكّر...

الحريم اللى جم عملوا ال"كالت" بتاع مزمزيل ليلى ده مقلوش همّا عايزين ايه برضه في الآخر. واضح كده انّهم مش فاهمين. باينّهم كده متّفقوش و لاّ ايه.. هم تلاقيهم قالوا قشطه... يعني حنثور على المجتمع الضال؟ آه و ماله يا حبيبتشي... ثوري براحتك... المهم تحطّي صورة الأم المدوّنه... اللى هو تحسّ انهم حاطّين صورة العدرا مثلا (no offence at all is meant here)

والطريف في الموضوع انهم يجوا يقولوا كلام غير الكلام... و كل واحده بتتكلّم في وادي... و كلّ واحده ماسكه في موضوع مستفزّ أكتر من اللى قبله...

في والله منهم قاله كلام جميل و فيه وجهة نظر.. لكن الغالبيه العظمى اتكلّموا عن الصياعه و قلّة الأدب و انحلال... و للأسف خلّوا صورة الـمدوّنه الأم (تحسّ غرندايزر كده) بقت وحشه جدا في نظر الرجّاله... من الآخر خلّوا شكلك يا ليلى هانم ولا فيفي عبده... أنا آسف بس هي دي الحقيقه.

و هنا بقى تيجي نقص الرقابه... مش كنتي تشوفي حريمك كاتبين ايه قبل ما تنشري؟ ولاّ هو أي حاجه فيها نبرة ثأر على المجتمع و خلاص؟

الظريف في الموضوع ان كل ما تدخل على بلوغغ من بتوع كلنا ليلى و ليلى للجميع تلاقي كل واحده راميه كلمه في أول الموضوع عن صاحبتها فلانه اللى قالتلها "ما تيجي؟"

أنا مالي دي صاحبتي اللى قالت لي... يا ترى هل ده يدل على ان الحريم صنف غدار؟ بيدوّر على شمّاعه دايما؟ هل الراجل بقى هو شماعة 2006؟ عااارف والله عارف... حتقولوا بس احنا قلنا انّنا مش كاتبين دي لغرض الضرب في الرجّاله... قال يعني كل ده مش ضرب... ده الواد عتريس قفاه اتهره جتكم القرف.

الأظرف بقى ان كل واحده برضه لمّا تيجي تعترض بتيجي تسألك : ايه ده؟ انت قريت كده على بلوغغ من بلغّات ليلى؟ مش منكن أبدا...

أمّال قريتها على بلوغغ أم عتريس؟ ما أكيد ليلى و أخوتها.

يادي الخيبه التقيله.

يا ماما منّك ليها روحوا شوفوا الأول صحباتكم البنات كاتبيت ايه و بعدين فكّروا و شوفوا هل همّ دول الـ"كالت" اللى حيحرّركم من الذل اللى انتم حسّين بيه ولاّ لأ..

حاسس انّي بتفرّج على FIGHT CLUB لمّا ادوارد نورتن قالّهم:

This man had a name. His name was Robert Paulson.

و قاموا قايلنله...

So in death, every member has a name. His name is Robert Paulson

و بقى كل ما حد يموت في أي ولايه يتلمّوا حوليه و يقولوا..

His name is Robert Paulson

His name is Robert Paulson

المصريين ابتدعوا النظريه دي من قبل السيناريو ده ما يتكتب...

سمّوها نظريّة "حافظ مش فاهم"

اللى فاهم يفهّمني علشان أنا غلب حماري و التحسيس عالـ.. بطحه بيهيّجها أكتر..

ولاّ ايه؟

خد بقى ياد يا عتريس الطشط زي ما هوّ كده و ارميه في الترعه عشان الخلطه تكمل..

هم شويّة بلهاريسيا و خلطة انحلال المجتمع حتهيج و تبقى جاهزه للبلع..

متحسّسش عالطشط يا حيوان... بطحه بس اللى يتحسّس عليها... آآآ قصدي...

آه هي بطحه صح.

خفت أكون قلت اسم تاني وأنا مش واخد بالي..

Posted by عتريس on Sunday, September 10, 2006 at 3:07 PM | Permalink